أصـــــــــــــــــداف

أصـــــــــــــــــداف

منتدى الشاعر معز عوض أبوالقاسم


    أرمي الدمعة فوق الدمعتين ياعين

    شاطر
    avatar
    معز عوض
    Admin

    عدد المساهمات : 254
    تاريخ التسجيل : 13/10/2010
    العمر : 34
    الموقع : http://asdaf.ba7r.org

    أرمي الدمعة فوق الدمعتين ياعين

    مُساهمة من طرف معز عوض في الخميس 30 ديسمبر 2010, 02:17

    أرمي الدمعة فوق الدمعتين ياعين
    ............................
    ارمي الدمعة فوق الدمعتين ياعين
    بعد الليلة حابسها الدموع لمين
    نزيف الدنيا من حد البلد غربي
    ونزيف الدنيا لاحد البلد شرقي
    وجوم عامة الليالي العامره
    كل الدنيا خاتة الخمسة فوق الاتنين

    رحيلك وجعة يااسماعيل
    رحيلك نجعة من دار الفرح والزين
    رحيلك طعنة في هات الحبد ريفير
    رحيلك وقفة فوق درب العليك باكين
    فيها نهاية المشوار وحد الفرحة والامال
    وحد الفال وحد الزين

    ارمي الدمعة فوق الدمعتين ياعين
    ويعد الليلة حابسها الدموع لمين
    بعد نزلت سكاكين القدر
    ديل مسنونة ديل فوق ديل
    وشربت من بواكرينا المعتق
    حالتو ياالداسنو من السيل
    وياالمحزون وحرابنا متكلات قدامو
    فوق مشنكسات الخيل
    وياالداخرنو من زمن الحساب
    شفعنا رابطين الحجر بالتيل

    وفجاءة يجينا من طرف السماء مرسيل
    ينعب فوق كلوب كاكول
    غراب هابيل يبقي رحيل
    رحيل كل الغيوم الهامعة متواسرات
    رحيل كل الشهور العامرة بالخيرات
    رحيل الطينة من طرف الجزر يومات
    رحيل الخضرة قدام منجل الهدام جفاف وممات
    رحيل البادية فوق برقا وراء نجيمات
    رحيلك مو رحيل اجيال
    رحيل اجيال .............؟
    رحيل بلدا تمام وكمال

    وياالعرشت فوق نخل السواقي الشال
    واتمددت فوق النيل من الشلال و لشلال
    وياالهاجرته فوق ريش الرهو رحال
    تظل مرسوم علي باب الليالي سؤال
    بعد عشعشت في خاطر الغبش موال
    واتبللت من الموية بين السعفة والبلال
    بعد عرقك برق في ترابنا حد ما شال
    واتمددت غادي وجاي
    يمين وشمال

    بعد الحال
    منو البقدر يجيب غربال يغربل روحك
    المدسوسة في الاجيال
    وفي نفس الدغش مبثوثة في الشتلة
    ونداها السال

    بعد الحال
    منو البقدر يطاول حرفك المعقود
    علي برقا حرير وهلال
    مسطور فوق رقاب البرد
    فوق الصخرة والتمثال

    بعد الحال
    رحيلك يا المشرشر في مداخل الدنيا
    كالاوصال
    رحيلك هزه في العقدة
    ومجامع الروح كما الزلزال

    ارمي الدمعة فوق الدمعتين ياعين
    بعد اليلة حابساها الدموع لمين
    كتير من شاف ديارو العامرة
    هاجت فوق درب وداي
    كتير من عدا فوق سردب
    بلا يوادع بلا يناشد كبار القوم
    وياخد راي كتير ياعين
    كتير الغابوا ماحضروا
    وكتير الراحوا ما عادوا
    وكتير البمشوا منو جاي
    الا الناعي

    عمرو الناعي شافوا لو مصير
    وتبكي طويرة الاحزان سنين وسنين
    مصيرة تساسك المسكينة بين الباسا
    والباساي
    ترفرف من سخاي لسخاي
    وتسال عن صدور مغسولة بالدوباي
    و تنزل فوق حلقات مجالس الشاي
    اقول الشيخ وفي الشاشاي
    تبل الريق من الدمع البيوشل من ارامل الحي
    وتشرق بالرحيح في الردحه و الوب احي
    وتمرق من محاري الناس تولول فيها جرس الصئ
    وتصرخ فايقة ياجلابة اقيفوا ليه
    وتسعد ضايقة ما شفتوه زولا ليه

    تضيع فرخاتو في المجهول
    ويرحل من دريب الضئ
    آه آه ياطويرة الاحزان
    آه لو كان تعرفي البيه
    جرحك انتي صاب الريح
    وجرحا ليه مسافر في النسيج الحي
    دريبي بعيد وحزني فريد
    ومما رحل البلبل الغريد
    بسرح في عيون الناس
    بسـأل ولوسؤالي يفيد
    اكيف الدنيا تصبح دنيا
    والصيد يبقي ياهو الصيد؟

    مين يقدر ينضم عقود منقوشة
    ترقد في حزوز الجيد
    ومين يضفر كلام الريد
    كلو جميل مصيروا يجي ومصيروا يفوت بلاتخليد
    كتاب الكون يظل مقفول
    بلا خاتمة بلا تمهيد
    وحتي النيل يكون مصيروا مجرد موية شاقة البير
    منو البيقدر يجيب ليكم خباراتو
    رقصة موجو في الشاطئ
    رواوشو , حكاياتو
    رقاد القمرة جنب النجمة فوق رملا مراياتو
    ولما تغيب ينوم النيل موشح بعباياتو
    وزي ما النيل يضيع في الدلتا يتلاشي
    ويموت مشلول
    انحنا كمان تفيض امالنا
    تنشرة في ساحل المجهول

    واي اسفاي
    واي اســــــــــفاي
    واي اسفاي علي حرف الشمخ في الطول
    وكيف الليلة في بطن التراب مسبول
    حرام تبلينا يا ايام
    حرام تملينا شوق وهيام
    اتارينا بنشيل من حرفك الجواني يااسماعيل
    ونقعد في حواشي الحضرة وانت تكب علينا غمام
    وماعارفين حروفك نازفة من شريات
    من دم القليب الاصلوا مابريات
    لما شربنا لما طربنا واتلفتنا ما لقيناك يا انسان
    وشفنا روحيتك الشفافة ركبت هودج الاحزان
    محمل فوق جناج ملكين
    ودريو علي مشارف الواحد الديان
    قوايمو شقايق النخل الوقع حزنان
    مضفور بسعف يابسط
    مفرش بكباد اماتنا والحبان
    مزمل بحبال صبرا فقدانهو زمان
    مضلل بالدموع شرقان ........
    عجيب ياهودج الاحزان
    مواسم الهجرة ما حانت ولا زمن الرحيل قد حان
    نسافر ليك وزادنا الشربه من بحر الحزن والاهه
    والحرمان

    وداك اليوم كان وداع الهودج المتهادي
    كان جامع رجلات الحضر والريف
    طيور السافل المحزونة جات بليلة تاركة جناها
    للريج والمطر والزيف
    وروح ترهاقه والعباسي وروح ايواتنا
    وريحة الماضي كلها جات
    منوكشايل وقف شاوش
    منكس بحرايو واقف بقفاهو تابعوا شايل سيف
    وبعد الليلة كل بنية تلبس فوق صديره كلين
    يكون مزروع فيهو قلب الشهيد وانت شهيدو
    يا اسماعيل

    ياالله يالله يالله
    بعد ما شلت اسماعيل وفات
    معاهو باقي كلام وباقي حنين
    يالله بعد الفجعة نظل شاكرين
    نظل واقفين علي بابك معاي طلبين
    يكون عيود معاهو التوم معاهو كذا شاهدين
    واقفين قدام قبر الولي اسماعيل
    نظل واقفين الليلة والباكر
    الي ماشئت يالله
    الي يوم الفصل والدين
    وداك يكون يومنا ونقالد فيه
    شيخنا اسماعيل.......
    avatar
    منجد معاويه

    عدد المساهمات : 14
    تاريخ التسجيل : 28/11/2010
    الموقع : http://asdaf.niceboards.net

    رد: أرمي الدمعة فوق الدمعتين ياعين

    مُساهمة من طرف منجد معاويه في الأربعاء 05 يناير 2011, 23:13

    كلو جميل مصيروا يجي ومصيروا يفوت بلاتخليد
    كتاب الكون يظل مقفول
    بلا خاتمة بلا تمهيد
    وحتي النيل يكون مصيروا مجرد موية شاقة البير

      الوقت/التاريخ الآن هو الإثنين 22 أكتوبر 2018, 10:22