أصـــــــــــــــــداف

أصـــــــــــــــــداف

منتدى الشاعر معز عوض أبوالقاسم


    أمومة وطن

    شاطر
    avatar
    معز عوض
    Admin

    عدد المساهمات : 244
    تاريخ التسجيل : 13/10/2010
    العمر : 34
    الموقع : http://asdaf.ba7r.org

    أمومة وطن

    مُساهمة من طرف معز عوض في الجمعة 20 يناير 2012, 03:05

    ببقى إحترامك للفرح ،
    إعتراف منك
    بي إنو الدنيا ما زالت بخير
    وإنك موافق تحتفل
    بي نيل بيتسابق جواك
    ويديك شرف إنك تكون
    في ذاتو موج
    يا إمنحك حق الوصل
    لي أعلى قيفة أمنيه
    وآخر مرافي الأمنيات
    نيل يهدهد فيك أساك
    ويهبهبك من حر ظروفك ومحنتك
    نيل ، يساوي اليابسه فيك
    ويبقى ليك في الشِده زاد
    أو يطرحك في رملو أم
    أم بي تفاصيل أغنيه
    ورتبة وطن
    وحراز ونخله
    وبرتكان وأبنوس وقيف
    تقراك حضور
    رغم إنتمائك للغياب
    وتغيِّب الهم من شوارعك
    تبقى فيك غيمة حنان
    وكتين يِقِط فيك اليقين ...
    ووكتين تبعثرك الظنون ،
    تبداك ، تلِمَّك من قفاك
    وتسكِنك في ذاتا ذات
    من غيرا كان
    بيقسم معاك وجع الطريق !
    مين تبتبَك !
    مين هدهَدَك !!
    من الحواك
    وكتين طلعتَ الدنيا حفيان
    من معاني الفرحه فيك
    مسلوب وطن !!!
    مين اللي كان جواك ملاذ ؟
    مين دوزنك !
    مين رتَّبَك !!
    مين الوكِت هداك زمانَك ،
    تاني عاد طينة بُناك !!؟
    مين البكاك
    وكت الفرح
    بقى ما بيعبِر عنو في العالم
    خلاف ضحك الدموع ؟
    مين إصطفاك
    وإصطَّفَّ داخلك بإنتظام !!
    مين القدُر ما يشتِّرك حزنك نحيب ،
    تلقاو يقسِّم في ملامحك إبتسام !
    مين السِهر علشان تنوم آمن سعيد !
    مين ونَّس الليل والنجوم
    شان إنت تغرق في المنام !!
    مين سنَّ قلمك
    شان تستطيع
    تكتب دواخلك في الورق
    بي رغم أُمية محابرك
    ورغمِ أمية جواك ؟؟؟
    الأم منو الغير إيدياتا الوصول
    وكيف يستقيم للأنثى ضل
    عود الأمومه إذا انعوج !!؟
    تكفي الأنوثه شرف تكون
    في الدنيا أم
    ويكفيني تأشيرة أكون
    أنا زول بيكتب في النهايه
    عن الوطن
    أو أيِّيِ أم .



    _________________
    [size=18]ما بصنع التاريخ خؤون
    وما ببني باكر
    إلا زول
    شايل معاول الكلمه سيف

    [/size]

      الوقت/التاريخ الآن هو الأربعاء 15 أغسطس 2018, 08:03